• BNO

喺英國中咗武漢肺炎,係咪冇得睇醫生?

Updated: Jul 30, 2020

冇錯,而家嘅指引都係叫你留係屋企唔好出街傳染到其他人,自己買必理痛或Ibuprofen,因為絶大部份情況都可以自我痊愈,但係如果真係去到抖唔到氣嘅時候先至打電話去NHS熱線,再會安排你去醫院。


所以好多人都擔心呢一邊嘅醫療,亦有唔少香港人過到嚟覺得呢邊啲醫療好廢(自己初初到英國嘅時候都有呢個感覺,但係後來了解多咗佢地個concept嘅時候梗係覺得唔係啦),因為例如一般要睇家庭醫生GP,一般都要排兩個星期至到一個月不等。


感冒想睇個醫生都要等三個禮拜,到時都好返啦!冇錯,就係咁,既然你會自己好返,做乜要浪費政府資源睇醫生呢?所以簡單咁講呢度嘅醫療文化係一般可以自我痊愈嘅疾病,就無需要睇醫生,自己上返佢哋網站睇吓指引,買成藥食,飲多啲水,等你身體嘅抵抗力自己搞掂。


相反,對於其他疾病例如長期病等,呢度嘅資源係充足嘅,亦都做得幾好,排期嘅時間普遍亦都短過香港。自己同好多身邊嘅人都有經驗,都覺得呢度啲醫護做得好好同埋好細心。


簡單講,小事嘅話就靠自己抵抗力等佢好返,急事嘅,就去醫院急症,唔知乜嘢事嘅就排期睇GP安排檢查或者轉介去專科。


咁我睇私家醫生得唔得?

門診收費£40至80左近,但係呢度極少人係睇私家醫生同埋亦都好參差,絶大部分人都係靠政府嘅國民保健服務NHS(免費嘅,但會收取配藥費£9.15,而喺未成為公民之前,喺嚟緊十月起,每年要比£624,18歲樓下£470)。


呢度嘅醫療其實幾好,不過要習慣下唔係事無大小都睇醫生,咁如果真係有事唔放心,又心急嘅話,都可以睇近年推出左好多嘅網上睇醫生服務(GP同私家都有),一個app搞掂哂。





105 views0 comments