• BNO

究竟英文同Life in the UK test有幾難?(一)

Updated: Jul 30, 2020

完全估唔到有咁多人會擔心呢個問題,太過意料之外。當攞住BNO過到嚟住夠五年,喺申請settled status嘅時候,按而家嘅程序,係要證明你嘅英文能力達到最少B1 CEFR,而另外亦都要通過Life in the UK test。


英文要求B1 CEFR即係點呢?其實ielts考到4分已經足夠,咁如果我之前考高過4分可唔可以用來做申請呢?又未必得,因爲喺一般嘅情況下,你唔可以用超過兩年嘅考試成績去申請settled status。


而其實B1 CEFR亦都唔一定要係考ielts,但係其他就唔講啦,淨係講當中應該算係最簡單嘅 IELTS Life Skills– B1 Speaking & Listening,考到呢個合格,就可以通過英文嘅要求。咁睇個名就知,淨係考聽同埋講嘅啫,閱讀同埋寫作就唔需要,所以我哋一直都講話呢個試係好容易考,照計你唔會過咗嚟幾年,基本嘅聽同講都搞唔掂掛?


基本嘅問題佢會問你 What is your name? Can you spell it for me? Where do you come from? How long have you lived here?


係咪好簡單呢,當然都仲有其他問題會問,但係都係咁上下嘅程度。亦都明白可能有人真係完全唔識英文,如果你真係呢幾條問題都覺得有困難嘅,都唔緊要,你仲有幾年時間喺英國俾你慢慢練習。


講到明係life skills,基本上如果你通過唔到,你都冇乜可能喺英國到生活到,嚟到個環境會逼到你學㗎喇,咁多年來都冇聽人講過因為考唔到呢個試而要遣返。


最後留意番係要兩年之內嘅成績,所以建議喺第三同第四年之間考,萬一真係fail咗,都仲有大把時間俾你補考(每次£150)。

以下人士無需考呢個試: 18歲以下或65歲以上 有醫生證明身體健康問題

大學畢業而課程係用英文教學,可以去www.naric.org.uk去認證返就得

唔好問我如果到五年嘅時候都考唔到會點,冇聽過冇見過上網都搵唔到有咁嘅經驗,你有嘅話我知。有啲長,Life in the UK test下個post講


呢條片有講解,可以參考一下睇吓自己聽唔聽得明: https://youtu.be/s3ErfZVIM3c

政府網頁資料: https://www.gov.uk/english-language



641 views0 comments