• BNO

英國嘅生活適合你嗎?

Updated: Jul 30, 2020

英國嘅生活係唔係適合自己?係走難定係移民?


過嚟旅行可能好好玩,但生活就係另外一回事,最多人關心搵唔搵到工做,如果本身係專業人土收入又幾好,喺英國可能要預多少少時間搵,甚至乎轉行,同埋要預咗交重稅(年薪£12,501 至£50,000嘅收入要交20%,£50,001 至£150,000要交40%,£150,000以上要交45%),同埋大約12%嘅national insurance(國民保險)另加住屋嘅council tax,即係如果當你本身搵開五萬蚊港幣一個月,收入會得返35,000左近,如果純粹咁計,對好多人都好難接受。不過英國平均人工又會高過香港少少,所以都要睇返工種而定。But anyway如果你覺得錢係最重要嘅,咁留喺香港可能都唔錯。


反而最多人頂唔順嘅就係覺得英國生活苦悶,冇香港咁方便,咁多姿多彩同熱鬧,咁呢樣要睇你自己興趣,有啲人反而覺得呢度多啲空間同時間做到自己想做嘅嘢。

英國嘢食舉世知名,曾經有人連Pret A Manger都可以同我講幾好食⋯⋯呢個相信係英國人基因嘅問題,如果你好鍾意食嘢,尤其係亞洲菜,就真係要慎重考慮一下(唔好諗住唐人街可以解決,唐人街已經遍佈殘體字同埋川菜), 不過近呢10幾年好咗好多,但係口味嘅嘢,有啲人真係頂唔順。


周圍嘅嘢變曬英文,都要考慮吓語言能力,當然以大部份香港人來講,基本嘅英文都唔會太差,半年至一年應該可以適應到,但如果係I go to school by bus 嘅,就要花多少少時間學下,如果唔係都幾難適應到英國嘅文化。

心態決定一切,每個人嘅選擇都唔同,冇必要勉強,只不過如果你抱住走難嘅心態,咁你就係一個難民,面對長期陰沉嘅天氣,變成終日愁眉苦臉,自覺人離鄉賤嘅老華僑。



108 views0 comments